GIDAKOP ang usa ka lalaki human kini makuhaan ug armas sa gipahigayong operasyon sa kapulisan gahapong adlawa bandang alas 5 kapin sa hapon Mayo 6, 2025, sa Purok-1, Barangay Fatima, Payao, Zamboanga Sibugay.

Ang maong operasyon gipangulohan sa Payao Municipal Police Station (MPS), nga nakig-alayon sa Commission on Elections (COMELEC) ug sa 106th Infantry Battalion. Nasayran nga gilusad ang maong operasyon human makadawat og report gikan sa usa ka nagpakabana nga lungsoranon kabahin sa presensya sa maong kadudahang tawo sa maong dapit.

Sa pagresponde sa mga otoridad, ilang namatikdan ang klarong bukol sa tuong hawak sa suspetsado ug sa ilang pag inspection niini ilang nakuha ang usa ka caliber .45 nga pistola nga adunay magasin nga kargado sa unom (6) ka buhing bala. Wala makapresentar ang suspetsado og lisensya o bisan unsang dokumento nga naghatag og legalidad sa pagpanag-iya sa maong armas.

Samtang gidala gilayon ang maong suspetsado ug ang nakumpiskang armas sa Payao MPS alang sa tukmang disposasyon samtang pasakaan kini ug kaso kabahin sa pagsupak sa illegal possession of firearms and ammunition ug pagsupak sa Omnibus Election Code.

Courtesy: Zamboanga Sibugay Police Provincial Office